مرد ونامرد/الیاس امیرحسنی

سلام
فارسیجا بیر داستان وار،خیر وشر آدونا،بوداستانی کی من آنامدان نقل ائلیرم چوخ اوداستانا شبیه دیر ولی فرقلری ده چوخدور

ناغیل:مردونامرد
یازان:الیاس امیرحسنی
قایناق شخص:صفیه قدیری(آنام)74یاشوندا
بیری واروموش،بیری یوخوموش،آلله دان سوای هئچ کیم یوخوموش،اوزاخ زمانلاردا بیر مرد واروموش بیر نامرد.
بولار ایستریمیشلر گئده لر سفره،ایکی سیده،بربساط گوتورولر و دوشلر یولا.
هر یئرده آجوخولار مرد کیشی سفره سین آچار ییه للر،هر یئرده سوسوزولار مرد کیشی سو وئرر ایچللر.
جانوم سنه دئسین گئدللر وگئدللر،مرد کیشی نین هاموزادی توکنر،نامرد کیشی بونا هئچ زاد وئرمز،بئله اولار کی مرد کیشی نین ائشگی ده آجوندان اولر.نامرد کیشی بئله کی گورر مرد کیشی دن آرالانور.
خلاصه آرالانولار ومرد کیشی گئدر،گئدر چاتار بیر آقاجا،بیردن بو آقا ج دیله گلر،دییئر ای عمی منیم آلتومدا،چوخلی طلا وار،گل بولاری چیخار،طلا لارمنیم باشوم آقروتولار.
مردکیشی دوشر فیکره،بیله سینه آقاجون دانوشماقی عجیب گلر،قورخار دییئر قوی گئدیما آلا ها توکل.
گئدر چاتار بیرباشقا آقاجا اودا دیلله نر،دییئر منیم آستومدا بیر عالمه طلا وار گل بولاری چیخار،بولار منیم باشوم آقروتیری. بودفعه مردکیشی آقاجون سوزونه قولاق آسار وطلا لاری چیخارتار.
دوشر یولا گئدر گورر بیر سوری داوار،سورونون کپکی بوکیشینی گورنده،گلر یاخینلاشار،دیلله نر،دییئر،منیم می نیم فلان پادشاهون قیزینین علاجودور. او پادشاهون قیزی فلجیمیش.
مرد کیشی چوپانا دییئر،چوپان جان بو طلالاری وئررم سنه بوکپکینی وئر منه.چوپان کپکی وئرر،مردکیشی کپکی آپارار بیر یئرده اولدورر ومی نین چیخارار،لشین ده آتار اوردا یو گئدر.
ایندی خبر آل،نامرد دن،اودا گئدر آمما بد دن بلویا دچار گلر.بیر قورتوم سو بوغازوندان،خوشلوقونان آشاقی گئتمز.
خلاصه داستان بورا چاتدی کی مرد کیشی گئدر چاتار شاه دربارونا ، دییئر من ایستیرم شاهی گورم.دییئرلر بابا سن هارا شاه هارا ، سن بیر جولومبول آدام ،انتظاروی وار شاه سنی حضورینه قبول ایلیه ،گئت باشوی پیکارونا .مردکیشی دییئر سیزین نه ایشییزوار ،پادشاها دئیین گورون نمه دییئر .گئدللر شاها دییللر ،شاه دییئر قویون گلسین گورک کیم دیر و نه ایستیر .

خلاصه مرد کیشی گئدر پادشاه خدمتینه،دییئر سلطان سلامت اولسون من بیر دواگتیرمیشم کی سنین قیزینین علاجودور.
شاه دییئر چوخ یاخچی،من عهد ائله میشم هرکیمسه باشارا منیم قیزیم ساق،سلامت ائلیه ودورا یولانا،قیزیم اونا وئرم.
دستور وئرر مولا چاقورولار،مولا گلر قیزین عقدینی بومردکیشیه اوخور وکبینین کسر تا بولار بیر بیرینه محرم اولا لار.
خلاصه،جانوم کی سن اولای،قیزین اتاقون خلوت ائللر،مرد کیشی کپک می نینی،قیزین باشدان تا ایاقونا سورتر.
بیر ایکی ساعاتدان سورا گورللر، قیز آی تکین،ائودن چیخیب گلیری،هرنه بو نون جووونه زنلیقیندن دئسم،آز دئمیشم.
قیزی آ پارالار حاما ما،مرد کیشینی ده نو نوار ائللر وبولارون تویون توتالار.
بویاندان بئش گون،اون گون چکمئز کی پادشاه اولر،مرد کیشینی اوتورتالار تخته و پادشاه اولور.
ایندی ائشیدک نامرد کیشیدن،قضا وقدر نامرد کیشینی ده گتیرر،یئتیرر بو شاهون مملکتینه. نامرد کیشی دوستون سراغلاشار. دییئر لر هاردا قویموشای،هاردا آختارورای،سن دییئن کیشی،بومملکتین پادشاهی اولوب.
نامرد گئدر پادشاهون خدمتینه،دییئر اعلی حضرتا،قدرقدرتا،منی که تانورسان،چوخ یازوق اولموشام،به چارا،بئناوا اولموشام گل منیم الیمدن توت،منه کمک ائله.
پادشاه دییئر من دئمه دیم سنه گل بیله ییه یک،گل بیله ایچک ،سن قولاق آسمادون،یئدی،ایچدی ودوردوی گئتدی.
سوز کی بورا یئتیشدی گئنه پادشاهون اوره گی رحمه گلدی،پولدان،پله دان بو نامرد دوستونا کمک ائله دی واونی یولادی گئتدی،مطلبینه یئتیشدی.

رازقان (لوح ساده )...